انا اسمي يوسف
ماعنديش موقع عشان اكتبه
بس انا خايف اوي
هاحيكلك من الاول
النهاردة الصبح ماما جابتلي ايس كريم وماجبتش لاخواتي اللي
اكبر مني هما الاتنين عندهم برد وبينامو في اودة لوحدهم
واصحابهم بيجولهم البيت وبيخرجو يتفسحو مع اصحابهم وعندهم
الكمبيوتر اللي انا بكتب عليه دلوقتي وبسمعهم بليل كل يوم
بيقعدو يكلمو ناس في الكمبيوتر كل ده ومش عايزني اكل ايس
كريم لوحدي
هما الاتنين قعدو يتكلمو كتير اوي مع بعض قبل ما بابا يجي
ولما بابا جه قالوله انهم عايزين يروحو لعمو
ولما ماما جت تلبسني عشان اروح معاهم قالولها سيبيه عشان
ده هاينام مننا في الطريق سبيه يقعد يلعب على الكمبيوتر وينام
في اودتنا واحنا لما هانيجي هانشيله ننيمه في سريره
ماما ماكانتش موافقه
بس هما قعدو يكلموها ويقولولها لو جه هايعطلنا وينام عند عمو
وحاجات كتير
انا كنت مبسوط اوي عشان هاقعد على الكمبيوتر
انا بلعب على الكمبيوتر في المدرسة
وبكتب عليه بسرعة كمان
وابله عزة دايما بتديني ستار
والسنه اللي فاتت خلتني اعمل ايميل
وبقيت ببعت لاصحابي
بس هما ماكانوش بيردو عليا علشان هما مش بيعرفو يدخلو على
النت
هما مشيو وقفلو عليا الاودة بعد ما دخلت الحمام وماما حطتلي
سندوتشات وازازة مية معايا في الاودة علشان خايفين عليا
لاحسن العب في البوتجاز
انا كنت بلعب فيه وانا صغير بس دلوقتي خلاص انا كبرت وبطلت
العب فيه زي الصغيرين
اخواتي كانو سايبين الكمبيوتر شغال
وكان مفتوح على موقع اسمه بعد منتصف الليل
كان فيه كلام عن الاشباح
انا ماعرفش الاشباح
ماشفتهمش قبل كده
ماعندناش حد جارنا شبح وصورة الاشباح مش موجوده في كتاب
القراءة
ومرة سالت استاذ محمد بتاع العربي يعني ايه شبح قالي يعني
عفريت
قمت انا هزيت راسي وعملت نفسي فاهم يعني ايه عفريت
عشان صحابي مايضحكوش عليا
ولما روحت البيت سالت ماما يعني ايه عفريت قالتلي يعني جن
قلتلها يعني ايه
قالتلي يعني ناس كده بس مش ناس بالظبط
بيخوفو الولاد الصغيرين اللي بيلعبو في حاجه الكبار ومش بيزاكرو
ولا بيشربو اللبن الصبح
كل الناس بقت بتخوف الولاد دول
ماما قالتلي ان
عم عبدو البواب بيخوفهم
واستاذ محمد وابلة عزة بيضربوهم
وابو رجل مسلوخه يخطفهم
وامنا الغولة بتاكلهم
وبابا بيزعقلهم
وماما كمان
ولما الناس كلها خلصت والولاد دول لسه ماخلصوش جابولهم
كمان ناس مش ناس بالظبط
جابولهم عفاريت
اهو بقي يا عمو العفاريت دي موجوده بره في الصالة دلوقتي
في صوت ناس في الصالة عمال يندهلي كل شوية
وصوت ضحك
وبعد ما يدحكو يقولو يوسف محبوس في الاوده
وهاياكله الديب
ويوسف لوحده مش هايقدر يضرب الديب
يوسف دلوعة ماما وبابا
ويقعدو يضحكو تاني
كل اخواتي دايما يقولولي دلوعة بابا دي
بس بابا دايما كان يزعقلهم
تفتكر يا عمو بابا هايزعق للعفاريت؟
هو مين اللي قال للعفاريت على اسمي يا عمو
انا خايف او ي يا عمو
اصلي كلمت بابا وماما عند عمو وقلتلهم على اللي حصل
قالولي مافيش حاجه
قلتلهم اني سامع صوت بره والصوت ده زي صوت اخواتي
قالولي اخواتك كلهم هنا قدامنا كل سندوتشاتك ونام
كل السندوتشات بس ماعرفتش انام
وبعدين حطيت سماعات الكمبيوتر على وداني عشان ماسمعش
ولما حطتها على وداني افتكرت الموقع بتاعك يا عمو
فقلت اكتبلك عشان تقولي اعمل ايه
عمو
في نور احمر جاي من بره
من الصالة يا عمو
والصوت سكت
عمو قولي بسرعة اعمل ايه
انا خايف اوي يا عمو